Wednesday 18th July 2018

    करारका १३ हजार कर्मचारीको भविष्य अन्योलमा    सर्बोच्चकै सरकार माथि यक्सन निषेधाज्ञा लगाउने निर्णयमा सर्वोच्चको रोक    रचनात्मक सहयोग गर्न तयार : नेता गच्छदार    कसले उचाल्ला २१ औं विश्वकपको ट्रफी ?    तयारीविनाको समृद्धि यात्रा

पर्यटकको रोजाइ बन्दैछ ‘चट्टान बगैँचा’

बुधबार, असोज १२, २०७३

प्रसिद्ध अन्नपूर्ण पदमार्गअन्तर्गत घेर्मुमा निर्माण गरीएको चट्टानको बगैँचा (रक गार्डेन) पर्यटकको रोजाइमा पर्न थालेको छ । घेर्मु– ९, खानीगाउँमा पर्यटकलाई लक्षित गरी बनाइएको ‘रक गार्डेन’मा दैनिक पर्यटक आउने गरेका छन् । अन्नपूर्ण पदयात्राका लागि आएका आन्तरिक तथा बाह्य पर्यटकलाई चट्टानको बगैँचाले आकर्षित गरेको हो । आन्तरिक पर्यटक पनि चट्टानको बगैँचालाई गन्तव्य बनाएर हेर्न खानीगाउँ पुग्ने गरेका छन् । अन्नपूर्ण पदमार्गको प्रवेशद्वार भए पनि जिल्लामा पर्यटक भूल्ने ठाउँ नभएको भन्दै खानीगाउँका स्थानीयवासीले ‘रक गार्डेन’ को निर्माण गरेका हुन् । करिब ३०० मिटर लम्बाइ र २०० मिटर चौडाइ रहेको चट्टानको भीरमा खोपेर ढुङ्गा काटेर बगैँचा बनाइएको छ । चट्टानको बगैँचा भ्रमणका लागि कम्तीमा ३० मिनेट समय लाग्ने संरक्षण समितिका अध्यक्ष कामसार्की गुरुङले बताए । बगैँचामा भएका ठूला ठूला चट्टानभित्र नै खाने, बस्ने र शौचालयको व्यवस्था गर्न लागेको उनले बताए । “हामी यसलाई उत्कृष्ट पर्यटकीय गन्तव्य बनाउछौँ,” उनले भने ।

चट्टानको बगैँचा हेर्न पुग्नुभएका जिविसका कार्यक्रम अधिकृत मेघेन्द्र पोख्रेलले प्रकृतिको उपहारको सही सदुपयोग भएको बताए । उनले भने,“हामी बाहिरका कुरा सुन्छौँ, पछि लाग्छौँ, तर यहाँ यस्तो प्रकृतिको उपहार रहेछ, यसलाई महत्व दिन ढिला भयो । यसको प्रवद्र्धन गर्नु हामी सबैको जिम्मेवारी हो ।” ‘रक गार्डेन’ निर्माणमा जिविसले वातावरणमैत्री स्थानीय शासन कार्यक्रमअन्तर्गत रु ८ लाख सहयोग गरेको छ । स्थानीय आमा समूह, युवा क्लब, समाजले आर्थिक तथा श्रम सहयोग गरेका छन् । गार्डेन संरक्षण समितिका अध्यक्ष गुरुङकाअनुसार यतिबेला ‘रक गार्डेन’ क्षेत्रमा ५८० मिटर लामो घुमाउरो बाटो निर्माण गरिएको छ । बगैँचा भित्रका चट्टानभित्र र बाहिर बाटो निर्माण गरिएको छ । एक चट्टानबाट अर्को चट्टानमा पुग्नको लागि पुल निर्माण गर्नुको साथै ठूला चट्टानमा चढ्नको निम्ती भर्याङ समेत राखिएको छ । चट्टानको बगैँचामा बिजुली सुविधा पुर्याउने, ओडार छिर्ने सुरुङमार्ग, वनभोजस्थल, पोखरी, ढुङ्गेधारा, कम्तीमा ६ वटा चट्टानभित्र बासस्थान, चट्टानमाथि फूल रोप्ने काम भइरहेको छ । प्राकृतिक सौन्दर्यताप्रति विदेशी तथा स्वदेशी पर्यटक पनि आकर्षित हुने भएकाले ओडारको अनुभव, विभिन्न आकार प्रकारमा रहेका चट्टानको आकृति र चट्टानमाथिबाट देखिने प्राकृतिक दृष्यले पर्यटक लोभिएका छन् । सो स्थानबाट उत्तरी लमजुङको प्रख्यात स्याङ्गे झरना, मस्र्याङ्दी नदीको मनोरम दृश्य, जङ्गली जडीबुटी र जनावर देख्न सकिन्छ । गार्डेन अन्नपूर्ण चक्रिय पदमार्गसँगै पर्ने भएकाले पर्यटकले एक दिन यही स्थानमा रात बिताउन सक्ने छन् । सदरमुकाम बेसीशहरबाट २४ किलोमिटरको दूरीमा गार्डेन रहेको छ ।