Thursday 17th August 2017

    फोरम र नयाँ शक्तिको घरदैलो कार्यक्रम तीब्र    गण्डकी गाउँपालिका बनाउने तिवारीको योजना    उम्मेद्वारी फिर्ता गर्न चाहाने उम्मेद्वारले आज ५ बजेसम्ममा फर्तालिन सक्ने    निर्वाचनमा सहभागी हुन नसकेका मजदूरले यस्तो भूमिका खेल्ने    बिरामी बोक्ने एम्बुलेन्सबाट गाँजा तस्करी

चीनमा नेपाली कला प्रदर्शनी

बुधबार, कार्तिक १०, २०७३

3748643831_82ee7c82c5_o1अठार नेपाली कलाकार र एक चिनियाँ कलाकारका कलाकृतिको प्रदर्शनी बेइजिङको ७९८ आर्ट भिलेजमा अवस्थित ‘जु लिन इस आर्ट सेन्टर’मा सुरु भएको छ । नेपालमा दुई दशकदेखि नेपाली कलाको प्रवद्र्धनको काम गर्दै आइरहेको थाङ्का हाउस र सेन्टरको संयुक्त आयोजनामा सो प्रदर्शनीको आयोजना गरिएको थाङ्का हाउस ठमेलका सञ्चालक वीरेन्द्र शाहीले बताए । यही कात्तिक २ देखि १४ गतेसम्म रहने सो प्रदर्शनीमा नेपालबाट समुद्रमानसिंह श्रेष्ठ, मुकेश श्रेष्ठ र राजप्रकाश तुलाधर सहभागी छन् । प्रदर्शनीमा नेपाली कलाकार पूर्ण ह्योजु, उजय वज्राचार्य, रितेश शाही, मदन किजु, हरिप्रसाद वैद्य, शुक्रराज तामाङ, रवीन्द्र मुनिकर्मी, देवेन्द्र सिङ्खवाल, शिवप्रसाद किजु, मीनु शाक्य लगायतका र चीनका हान ली रोङका कलाकृति पनि राखिएको छ । नेपाल र चीनको मित्रतलालाई प्रगाढ बनाउने उद्देश्य राखेर प्रदर्शनीको आयोजना गरिएको शाहीले बताए । चिनियाँ कला प्रवद्र्धक गो जिङ चाओले नेवारी कला प्रवद्र्धन गर्नका लागि चीनमा १० वर्षदेखि आफूसँग मिलेर काम गरेको शाहीले बताए । चाओले विशेषगरी नेवारी कलालाई चीनमा चिनाउन ठूलो भूमिका निर्वाह गरेका छन् । उनले भने,“हामीले नेपाली कलाको प्रवद्र्धन मात्रै होइन, सांस्कृतिक रुपमा एक अर्काका देशका कलालाई परिचित गराउने र कलाकारलाई अवसर प्रदान गर्दै आइरहेका छौँ, यसले अन्तर्राष्ट्रिय रुपमा नेपाली कलाको विकास र प्रवद्र्धनमा महत्वपूर्ण सघाउ पुर्याउन सक्छ भन्ने मेरो विश्वास हो ।”

नेवारी कला भनेपछि हुरुक्कै हुने चाओले थुप्रै नेपाली कलाकारका कला सङ्ग्रह गरेको प्रदर्शनीमा सहभागी कलाकार तुलाधरले बताए । उनले भने,“दुई वर्षअघि पनि चाओले नेपाली कलाकारका कला प्रदर्शनी गर्नुभएको थियो, अहिले पनि उहाँले शाहीसँग मिलेर अझ भव्य रुपमा चीनमा कला प्रदर्शनीको आयोजना गर्नुभएको छ ।” चीनबाट अनलाइनमार्फत कुरा गर्दै चाओले भने,“चीन र नेपालको पुरानो सम्बन्धलाई ताजा र चिरस्थायी बनाउनका लागि सांस्कृतिक सम्बन्धको महत्वपूर्ण भूमिका रहन्छ । यसै भएर नै हामीले नेवारी कलालाई चीनमा चिनाउने काम गरेका छौँ । आगामी दिनमा हामी अझ सशक्त रुपमा सम्बन्ध विस्तार संस्कृति आदानप्रदानको काम गर्नेछौँ ।” प्रदर्शनीमा सहभागी अर्का कलाकार मुकेशले प्रदर्शनीमा सहभागी हुन पाएकामा आफू उत्साहित रहेको बताए । उनले भने,“नेपाली कलाको विकास र अन्तर्राष्ट्रिय प्रवद्र्धनका लागि यो कला प्रदर्शनी कोसेढुङ्गा साबित हुनेछ ।” नेपाली पौभा कलाका परिचित कलाकार समुद्रमानसिंहले चीनको भ्रमण र त्यहाँको कलाको माहोलले आफूमा नयाँ उत्साह थपिएको बताए । उनले प्रदर्शनीमा राखिएका कलाकृतिमा विविधता रहेको र त्यसले नेपाली कलालाई बाहिरी संसारसँग परिचित गराउने अवसर रहेको स्पष्ट गरे । प्रदर्शनीमा तुलाधरले बनाएको हरितताराको चित्रलाई मोनालिसासँग तुलना गरेकामा गर्वको अनुभूति भएको सुनाए । सोही प्रदर्शनीका अवसरमा नेवार कलाका बारेमा जानकारी गराइएको शाहीले बताए । प्रदर्शनीमा नेपालबाट पाँच जनाको टोली आठ दिनको भ्रमण सकेर सोमबार नेपाल फर्किएको ललितकला पत्रकार देवेन्द्र थुम्केलीले जानकारी दिए ।